ڏاهري، قابل
قابل ڏاهري
قابل ڏاهري
قابل ڏاهري : نامور اديب ۽ صحافي قابل ڏاهري 25 جنوري 1954ع تي شاهپورچاڪر ڀرسان ڳوٺ عمر ڏاهريءَ ۾ عبدالواحد ڏاهريءَ جي گهر ۾ جنم ورتو. پرائمري کان مئٽرڪ تائين شاهپورچاڪر ۾ پڙهيو. انٽر جي تعليم گورنمينٽ ڪاليج سانگهڙ مان حاصل ڪيائين. ڪاليج ۾ شاگرد يونين جي سرگرمين ۾ ڀرپور نموني حصو وٺي شاگردن جا مسئلا حل ڪرائيندو هو. قابل ڏاهري تقريرن جي مقابلي ۾ حصو وٺي شاهه لطيف اوارڊ، اقبال اوارڊ، سورهيه بادشاهه اوارڊ، ڪافي ڪتاب ۽ ڊائريون بطور انعام حاصل ڪيا. هن جو ننڍي هوندي ئي ادب ڏانهن لاڙو هو، هن بزم گلشن ادب جي پليٽ فارم تان شاهپورچاڪر ۾ ادبي سرگرميون ۽ مختلف ميڙاڪا ڪرايا. هن شاگرديءَ واري زماني کان لکڻ شروع ڪيو ۽ اخبارن ۾ کليو سچ لکڻ ڪري تر جي هڪ وڏيري گهر تي پوليس جو ڇاپو هڻائي کيس گرفتار ڪرايو ۽ مٿس ڪيس هلائي کيس سينٽرل جيل ڪراچيءَ ۾ رکيو ويو. ڪجهه عرصي بعد ڪورٽ کيس باعزت آزاد ڪيو، جنهن بعد حيدرآباد مان باقاعدي صحافت جي شروعات ”مهراڻ“ اخبار کان ڪيائين. جتي هن حُر تحريڪ بابت ڀرپور مضمون لکيا ۽ ڪافي ڄاڻ مهيا ڪئي ۽ گڏوگڏ هن سنڌ يونيورسٽيءَ ۾ به داخلا ورتي. هو صبح جو يونيورسٽي ويندو هو ۽ شام جو پريس تي ڪم ڪندو هو. اهڙيءَ طرح هن صحافت ۽ سوشالاجي ۾ ايم.اي فرسٽ ڪلاس سيڪنڊ پوزيشن ۾ ڪئي. ان دوران هن ”حر تحريڪ جو سماجي جائزو“ عنوان هيٺ تحقيقي مقالو پڻ لکيو، هن ڪيترائي مضمون، مقالا، ترجما ۽ اخباري ايڊيٽوريل لکيا، جيڪي پسند ڪيا ويا. صحافت جي دنيا ۾ پاڻ بلڪل بي باڪ رهيو ۽ مظلومن سان وڏي همدردي هوندي هئس بنا ڪنهن لوڀ ۽ لالچ جي هن سنڌ ۽ سنڌي ماڻهن جي خدمت ڪندي زندگي گذاري. هن ڪيترن ئي دوستن سان سهڪار ڪندي کين سنڌ يونيورسٽيءَ مان ايم. اي ۽ پي. ايڇ. ڊي ڪرائي. قابل ڏاهري 1990ع ڌاري حيدرآباد مان هفتيوار ”سنيهو“ پڻ شايع ڪيو. کيس مطالعي سان گڏ سٺا ڪتاب گڏ ڪرڻ جو به شوق هوندو هو. قابل ڏاهري 38 سالن جي عمر ۾ گڙدن جي بيماريءَ ۾ مبتلا ٿيو، کيس ڪراچيءَ جي سول اسپتال ۾ داخل ڪيو ويو. سندس حيدرآباد ۽ ڪراچيءَ جي صحافي دوستن ان وقت جي سرڪار کي سندس علاج جي اپيل ڪئي پر پاڻ سرڪاري امداد وٺڻ کان انڪار ڪيائين ۽ پهرين آگسٽ 1992ع تي وفات ڪيائين.
لفظ قابل ڏاهريھيٺين داخلائن ۾ پڻ استعمال ٿيل آھي
داخلا ۾ استعمال ٿيل تاريخون
1954.01.25 عيسوي
نامور اديب ۽ صحافي قابل ڏاهري 25 جنوري 1954ع تي شاهپورچاڪر ڀرسان ڳوٺ عمر ڏاهريءَ ۾ عبدالواحد ڏاهريءَ جي گهر ۾ جنم ورتو.
1992.08.01 عيسوي
قابل ڏاهري پهرين آگسٽ 1992ع تي وفات ڪئي.
اديب - ڀاڱي جون ٻِيون داخلائون
پدم راج شرمارئوف نظاماڻي
جوگندر پال
عبدالڪريم سنديلو ڊاڪٽر
صبيحا نذير مگسي
ڄيٺو لالواڻي
اشفاق لغاري
حيدر بخش عزيز گوپانگ
سڪينه عتيق الزمان
اي جي اتم